İntim gigiyenanın 9 “olmazları”

Qadın sağlamlığı intim gigiyenası  çox incə məsələdir. Hər hansı səhvlər ağır nəticələr verə bilər. Çoxları təəccüblənəcək.  Müntəzəm, səliqəli yuyunmağın nəyi çətindir? Amma, bəzi qadınlar intim gigiyenada yol verdiyi kobud səhvlərindən bixəbərdir.

Məsələnin əhəmiyyəti

Qadının cinsiyyət orqanları xarici mühitlə daimi təmasdadır.  Bu əlaqə müxtəlif viruslara, bakteriyalara yoluxmaq təhlükəsi daşıyır. Patogen mikroorqanizmlərin basqınına 90% laktobakteriyalardan ibarət olan  uşaqlıq yolunun mikroflorası müqavimət göstərir. Onların arasında şərti-patogen, yəni, qabağını düzgün floranın aldığı   mikroorqanizmlər də var. Sağlam orqanizm düzgün mikrofloranı özü qoruyur. Qadın reproduktiv sistemində məskunlaşan südturşulu bakteriyalar turş mühit yaradır. Bu şəraitdə viruslar və patogen bakteriyalar sağ qalmır. Laktobakteriyaların sayı  azalırsa, şərti-patogen və ya xarici mühitdən daxil olan bakteriyaların artması üçün şərait yaranır.  

Ginekoloqlar təsdiq edir ki, mikrofloranın tarazlığını pozan səbəblər arasında intim gigiyena qaydalarının pozulması əsas rol oynayır.

Reproduktiv sisteminə zərbə vuran 9 əsas səhv

Statistikaya görə, qadınların təxminən 75% ömründə bir dəfə də olsa vaginal infeksiya ilə qarşılaşır. Bu cür patologiyanın bariz nümunəsi el arasında süd yarası adlanan kandidozdur. Kandidoza hətta cinsi əlaqə olmadan yoluxmaq mümkündür.  

Beləliklə, intim gigiyenada yol verilməyən 9 səhv haqqında danışaq.

Cinsi orqanları cəhdlə  yumaq olmaz

Cinsi orqanların aktiv və cəhdlə yuyulması böyük fəsadlar törədə bilər. Səylə aparılan gigiyena təbii mikrofloranı yuyub aparır. Bəzi qadınların təmizlik hərisliyi daha uzaqlara gedir. Onlar təkcə xarici cinsiyyət orqanlarını yumaqla kifayətlənmir, uşaqlıq yolunu da «təmizləyir».   

Bu cür aktiv hərəkətlər faydalı bakteriyaların sayını azaldır. Şərti-patogen mikroorqanizmlərin sayı kəskin dərəcədə artır. İnfeksiya asanlıqla reproduktiv sisteminə sirayət edir və böyük fəallıqla  inkişaf edir. Hədsiz təmizkarlıq vulvoginal kandidozların, vaginozların inkişaf etməsinə səbəb olur.  

Altdan yuyunmağdan imtina etmək olmaz

Ginekoloqlar intim zonanın gigiyenasını aşağıdakı hallarda tövsiyyə edir:

• səhərlər, yuxudan oyanandan sonra;
• cinsi əlaqədən əvvəl və sonra;
• tualetdən sonra;
• aktiv idman məşqlərindən, fiziki əməkdən sonra.

Evdən kənarda yuyunmaq müşküldür. Bu hallarda intim gigiyena üçün nəzərdə tutulmuş salfetlərdən istifadə etmək məsləhətdir.

Salfetlərdən çox istifadə etmək olmaz, çünki, hətta ən keyfiyyətli vasitələr adi yuyunmanı əvəz etmir.

Yuyunma qaydalarını pozmaq olmaz

Prosedurun zərər yetirməməsi, fayda verməsi üçün bir neçə qaydaları gözləmək lazımdır:

1. İlıq su. Yuyunmaq üçün yalnız ilıq sudan istifadə etmək lazımdır. Münasib temperatur 30°C-dir. Soyuq su iltihaba şərait yaradır. Çox isti su isə selikli qişanı yandıra bilər. 
2. Düzgün hərəkətlər. Qızları uşaq yaşlarından düzgün yuyunmağa öyrəşdirmək lazımdır. Hərəkətlər qabaqdan (uşaqlıq yolundan) arxaya (anusa) doğru başlamalıdır. Əksinə etmək yolverilməzdir. Düz bağırsaqda məskunlaşan çoxsaylı bakteriyalar uşaqlıq yoluna keçərək ciddi patologiya törədə bilər.
3. Suyun istiqaməti. Yuyunmağ yalnız xarici cinsiyyət orqanlarına aiddir, demək, su yuxarıdan axmalıdır. Su şırnağını birbaşa uşaqlıq yoluna tutmaq qadağandır. Əks halda təbii mikroflora yuyulub aparılır.
4. Yumşaq dəsmal. Yuyunmaqdan sonra orqanları yumşaq dəsmal ilə qurulamaq məsləhətdir. Sərt dəsmaldan istifadə etməyin, selikli qişalar zədələnə bilər. İstifadə etməzdən əvvəl dəsmalı qaynatmaq ya da isti ütü ilə ütüləmək məsləhətdir.

Adi sabundan istifadə etməyin

Adi hamam sabunu intim zonanın gigiyenası üçün yaramır. Duş geli də çıxış yolu deyil, uşaq sabunu da. Bu vasitələr mikrofloranı ciddi pozmaqla infeksiyanın cinsi sistemdə yayılmasına şərait yaradır. Sağlam qadının uşaqlıq yolunda pH təxminən 4-5 bərabərdir. İntim gigiyena vasitələrinin pH göstəricisi də eynidir. Uşaq sabununda pH təxminən 7, adi sabunda isə – 9-dur. Bu cür aqressiv preparatların istifadə edilməsi turş mühiti sürətlə qələviləşdirir.

Dezodorantlardan çox istifadə eməyin

Xüsusi intim dezodorantların, kremlərin pH səviyyəsi uşaqlığın təbii mikroflorasına uyğundur. Onların qoxusu yoxdur (ya da yüngül meyvə, gül təravəti var), amma, qadının təbii «ətrini» çox gözəl gizlədir. Krem isə selikli qişanı qıcıqlandırmır.  Lakin, ginekoloqlar bu cür yeniliklərə ehtiyatla yanaşır. Mütəxəssislər onların istifadəsinə lüzum görmür və bunu əsaslandırır.   

1. Xoşagəlməz qoxunun olmaması. Hər gün səhər və axşam duş qəbul edən sağlam qadının heç bir qoxusu yoxdur və dezodoranta ehtiyac qalmır. 
2. Qoxunun gizlədilməsi. Mütəmadi su prosedurlarına baxmayaraq xoşagəlməz qoxu duyulursa, onu dezodorantla «boğmağa» çalışmayın, çünki, bu reproduktiv sistemdə patologiyanın yaranmasına işarədir. Ginekoloqun yanına getməyin vaxtıdır.
3. Əlavə komponentlər. İntim gellərin, dezodorantın tərkibində çoxlu müxtəlif inqrediyentlər, o cümlədən, kimyəvi maddələr var. Bəzən kimyəvi komponentlərin təsiri göynəmə, qaşınma yaradır, qoxunu yaxşılaşdıran vasitələr isə kontakt dermatit törədə bilər.

Xəstəlikləri gigiyena vasitələri ilə “müalicə” etmək olmaz

İntim kosmetika sağlam qadınlar üçündür. Hətta, istehsalçının bəyan etdiyi iltihabəleyhinə, antibakterial təsir medikamentoz preparatlarla rəqabət apara bilməz, çünki, dərmanların tərkibində lazımi maddələrin miqdarı daha çoxdur. Özünümüalicə ilə məşğul olan qadınlar daha bir məqamı unudur. Belə ki, reproduktiv sistemində yoluxucu-iltihab prosesi  müxtəlif bakteriyalar törədə bilər. Mikrofloranın laborator müayinəsi aparılmadan xəstəliyin törədicisini aşkar etmək mümkün deyil. Demək, düzgün və adekvat müalicədən də söhbət gedə bilməz.

Gündəlik bezləri daim istifadə etmək olmaz

Qadınların çoxu gündəlik bezləri məmnuniyyətlə istifadə edir. Onlar doğrudan da bir çox hallarda qadınların dadına çatır. Amma, həkimlər bezləri daimi istifadə etməyi lazım bilmir. Bezlər orqanizmə ciddi zərər yetirə bilər:

1. Dəri səpgisi. Havasızlıq səpgilərə şərait yaradır. Bütün bezlərin, hətta, «super nəfəs alanların» da nəmi və havanı buraxmayan yapışqan qatı var.
2. İnfeksiyanın inkişafı. «Parnik» şəraitində patogen bakteriyaların inkişafı üçün münbit şərait yaradır. Uzun müddət gündəlik bezlərdən istifadə edən qadınlarda müxtəlif infeksion-iltihab xəstəliklər yaranır.
3. Allergik əlamətlər. Bezlər sintetikadan hazırlanır. Bu cür materialların dəri ilə təmasda olması arzuolunmazdır. Allergiya özunu qaşınma, göynəmə, qıcıqlanma ilə göstərir.

Ginekoloqlar gündəlik bezləri nadir hallarda tövsiyyə edir. Bezləri 2-4 saatdan çox saxlamaq, gecə ya bütün günü gəzdirmək olmaz.

Sintetik ya dar ağları geyinmək olmaz

1. Sintetika “nəfəs almır”. Yaraşıqlı, krujevalı alt paltarı təhlükə mənbəyidir. Sintetik parça hava buraxmır, tez-tez allergik reaksiya törədir. Həkimlər pambıq alt paltarını məsləhət görür.   
2. Müdafiə yoxdur. Strinqlər cəlb edir, amma, alt paltarı olaraq əsas funksiyasını yerinə yetirmir, cinsiyyət orqanlarını yoluxmadan qorumur.
3. Bakteriyaların keçməsi.  Nazik ipli al paltarı qadın sağlamlığı üçün böyük təhlükədir. Əvvəla, onlar daim anusu sürtür, bir də, bakteriyaları anal dəlikdən uşaqlıq yoluna  keçirir.

Qidanı pozmaq olmaz

Orqanizmdə bütün proseslər qarşılıqlı əlaqədədir. Belə ki, bəzi qida məhsulları uşaqlıq yolunun mikroflorasını pozur, xoşagəlməz qoxu yaradır. Düzgün qidalanan qadınlar intim zonada yaranan problemlərlə az üzləşir.

1. Duzlu balıq, pivədən çox istifadə etməyin. Bu məhsullar ciddi narahatlıq yaradır, xoşagəlməz qoxuya səbəb olur.
2. Şirniyyata həvəs göstərməyin. Şirniyyat sevən qadınlar kandidozdan daha çox əziyyət çəkir.
3. Quşüzümü şirəsi, qatıqdan istifadə edin. Onlar süd yarasına qarşı təsirlidir.
4. Sarımsaq yeyin. Spesifik qoxulu məhsul qadın orqanizmi göbələkdən qoruyur.