Dr. Cəbrayıl Abbasov: Klinikaların sosial media startegiyası necə qurulmalıdır?

Müasir dövrdə tibbi xidmətlərlə bağlı ilkin məlumat axtarışı əsasən Google və sosial media platformaları üzərindən həyata keçirilir. Artıq klinikaların sosial media hesabı sadəcə məlumatlandırma vasitəsi deyil, əksinə, etibarı qurmağın, brendi tanıtmağın və auditoriya ilə səmimi bağ yaratmağın əsas alətinə çevrilib.

Ailehekimi.az Dr. Cəbrayıl Abbasovun klinikaların sosial media strategiyasına dair aktual mövzuda məqaləsini təqdim edir:

Klinikanın sosial media səhifəsinin effektiv və inandırıcı olması üçün aşağıdakı strateji addımlar atılmalıdır:

Peşəkar vizual kimliyin qurulması
Profil şəkli, banner və postların dizaynı daxil olmaqla, hər bir vizual element ilk təəssüratı formalaşdırır. Klinikaya aid vahid və cəlbedici vizual stil izləyicilərdə güvən, ciddilik və peşəkarlıq hissi yaradır.

Dəyərli və strateji məzmun planı
Uğurlu səhifələr yalnız xidmətlərini paylaşmır, eyni zamanda izləyiciləri maarifləndirir, suallarına cavab verir və onları prosesə cəlb edir. Paylaşımlar sağlamlıq haqqında qısa, elmi əsaslı məlumatlar, klinikada tətbiq edilən yeni texnologiyalar və həkim heyəti haqqında tanıtımlar, pasiyent rəyləri, uğurlu nəticələr, real hekayələr və komanda üzvlərinin təqdimatından ibarət olmalıdır, çünki insanlar xidməti fərdlərlə əlaqələndirərək daha asan münasibət qurur.

Aktiv auditoriya ilə əlaqə
Yalnız post paylaşmaq kifayət deyil; sosial media ikitərəfli ünsiyyət tələb edir. Şərhlərə mütəmadi cavab vermək, mesajlara nəzarət etmək və izləyicilərlə real ünsiyyət qurmaq səhifəni canlı, inandırıcı və xidmət yönümlü edir.

Nizamlı və strateji paylaşım ardıcıllığı
Sosial media effektivliyi bir dəfəlik aksiyalarla deyil, sabit və strateji fəaliyyətlə ölçülür. Həftəlik 2-4 əsas paylaşım, gündəlik Story paylaşımları və ayda 1-2 interaktiv kampaniya brend tanınmasını və etibarını davamlı olaraq gücləndirir.

Etik və hüquqi normalara əməl etmək
Tibbi məlumatların paylaşılmasında etik və hüquqi yanaşma zəruridir. Pasiyent razılığı olmadan heç bir şəxsi məlumat, şəkil və ya rəy paylaşıla bilməz. Bütün tibbi məlumatlar yalnız sübuta əsaslanan, elmi cəhətdən təsdiqlənmiş mənbələrə söykənməlidir. Bu, klinikanın peşəkarlığını və məsuliyyətini nümayiş etdirir.

Klinikaların sosial media səhifələri təkcə tibbi xidmətləri tanıtmaq üçün deyil, brendin dəyərlərini, etik prinsiplərini və yüksək xidmət keyfiyyətini əks etdirmək üçün güclü bir platformadır. Sosial media – klinikanızın rəqəmsal vitrinidir. O vitrində peşəkarlıq, etibar və səmimiyyət görünməlidir, çünki insanlar təkcə müalicə deyil, həm də həkimə və klinikaya etibar axtarır.